Merun mga karanasan sa buhay ko na gusto ko lagi ginugunita. At merun din mga bagay na di mo inaasahan, gaya ng Pagkakataon, Amuy, Lasa, Musika, Lugar at iba pa na nagbabalik sa aking mga ala-ala at isa na dito ang Tag-araw. Pag ganito ang panahon bumabalik sa isipan ko ang Masarap na Ice Candy na gustong-gusto ko lantakan lalo na't pag pawisan kakalaro at pawisan dahil sa init ng tag araw.
Si Aling Fausta o minsan ang tawag ko sa kanya ay Aleng Usta ay matagal na naming kapit bahay, at sya ang may ari ng sari-sari store sa tapat ng bahay namin. Hindi pa ako sinisilang kapit bahay na namin sya. Ang tindahan ni Aling Fausta ay halos katapat lang din ng tindahan ng Lola ko, si Thomasa at mag kaibigan sila. Madalas ko sila nakikita nagkukwentuhan araw araw tungkol sa maraming bagay at minsan usapang Simbahan, lalo na pag umaga at magbubukas palang sila ng tindahan magwawalis-walis muna sila ng tapat ng bahay. Ang mga anak at apo ni Aling Usta ay kaibigan din ng mga kamag-anak ko.
Ang tindahan ni Aleng Usta ay Gawa sa semento at kahoy. Ang parihaba na saraduhan nito na tumatakip sa harapan ay pintorado ng kupas na kulay luntian at ito ay markado ng numero para di magkapalit palit ang mga kahoy. At mag mula sa kalsadang lupa merun tatlong malalaking baitang ng hagdan papunta sa harap ng kanyang tindahan. Sing Lapad ng tindahan nya ang isa't kalahating dipa ng isang matandang tao. At sa dalawang gilid nito ay merun upuan na yari sa concreto din. At sa gilid naman nito ay merun gapangan ng sampaguita na madalas na humahalimuyak. At dito sa mga sementong upuan na ito, dito kami naglalagi pag merun kwentuhan o minsan hintayan ng mga barkada.
Minsan pag nakaistambay lang sa harap ng tindahan di ko maiaalis sa sarili ko na magshopping ang aking paningin sa nilalaman ng tindahan lalo na't naghihintay sa mga kaibigan. Sari sari ang makikita sa loob ng tindahan ni Aling Usta kaya tinawag din ito sari sari store. Merun candy, mang kepweng, pompoms, marie biscuit, kropek, tira-tira, plastic balloon,tootsieroll, butung pakawan, shok tong, belekoy, paminta, sundot kulangot, alhambra, haw-haw flakes, nuggat, softdrinks, bond paper, suka, toyo, patis,art paper, ballpen, listahan ng utang,bazooka bubble gum, anejo ruhm65, sardinas, at iba pa at syempre di mawawala ang Ice candy.
Sa Halagang Uno Singkwenta merun ka na masarap, malinam-nam na Ice banana para pang alis ng iyong bagot at Init. Hindi sa lahat ng panahon merun tinda ganito si Aling Usta. Kadalasan ang Ice banana nya ay lumalabas lamang tuwing sa panahon ng tag-araw. Ito ay limited offer lang at kadalasan ito ay sold out. Kaya dapat maagap sa pagbibili At kadalasan pag wala sa tiempo ang pagtatanong ko na kung merun na sya tinda na ice candy, minsan aabutan ko malambot pa, minsan niluluto palang ang saging, minsan ubus na. Kaya maswerte na pag merun ka inabutan at kung wala naman mag tiyaga nalang sa regular na ice candy. At ang regular ice candy ay nagkakahalaga lamang ng 50cents at ito ay payat di tulad ng ice banana mataba sing bilog ng pinaka malaking batterya ng eveready at sing taas naman ng malaking lata ng alaska evaporada. Ang regular na ice candy ay mabibili lamang sa lasa ng orange, ubas, pinya at minsan pag spesyal naman ice buko sa halagang 75cents. Pero iba parin ang Ice banana, wala ito titulo na special gaya ng ice buko pero para sa akin ito ay espesyal. Espesyal dahil sa paraan palang ng pagluluto nito ay may karagdagan na sikap.
Wala naman formal na pagsasalin sa akin ng kaalaman tungkol sa pagluluto at pag-gawa ng ice banana. Dahil matanong lang ako, ang ginawa ko ay pinagtahi-tahi ko nalang kung paano ito ginawa at di naman pala ganung kahirap. Pero mas matagal ang paghahanda kung ikumpara sa ordinaryo ice candy. Tulad nalang ng pag babalat ng saging na saba at hihiwain pa ito sa apat na parihaba, pakukuluaan sa arnibal na may pandan, lagyan ng vanilla para mabango, ihahalo sa pinakuluan sago at palalamigin at timplahin na parang juice. Pagkatapos tatakalin para isalin ito sa plastic, yun na! Pwede na balutin at patigasin sa freezer.
Patok na patok talaga ang ice candy ni Aling Usta mapa bata o matanda at hindi sya mauubusan ng mamimili dahil sa kalye palang namin namumulaklak na ng mga bata. Hindi lang basta batang kalye ito, sila yung tipo na may kwintas na libag sa leeg o naka-kwintas na tirador.At paborito dapuaan ng langaw dahil amuy araw at minsan di mag kapareho ang tsinelas ang sa kaliwang paa ay rambo at sa kanan paa naman ay spartan na butas ang sakong. Kadalasan merun sila sugat sa tuhod dahil madalas madapa sa takbuhan at minsan naman pawis ang ilong na may kasama sipon na walang kapaguran labas masok taas baba kasisinghot. Minsan ang damit ay merun mantsa ng dumi, tagpi at sulsi. Sila ay madalas nag lalaro sa tapat ng tindahan ni Aling Usta at masugid na tumatangkilik sa kanyang paninda.
Lagi masaya sa kalasada namin hindi nauubusan ng pwede laruin ang mga bata andyan ang tumbang preso, patintero na kadalasan ang guhit na pangmarka namin ay tubig estero, syato, habulan, chinese garter, teks, luksong tinik, holen, laban ng gagamba, trumpo, luksong baka, moro moro at piko. At pag sapit naman ng dilim pag katapos mag hapunan maglalabasan na ang mga bata sa kalsada para magtaguan. Hindi parin natatapos dito ang pwede pag libangan dahil kung lahat man ng nabanggit ko ay nalaro na, marami parin pwede paglibangan dahil sa kalapit bakuran na bakanteng lote ay merun mga nakatanim na malalaking puno ng kaimito at mangga at sa harap naman ng bahay namin merun malaking puno ng aratilis at langka at minsan madidinig nalang ang hiyaw ng lola ko para sambitin ang mga katagang "Bumaba kayo dyan at baka mahulog kayo, marupok ang sanga na yan!".. Eh Sinong bata naaman ang gusto mag pasaway. Kaya imbes na matigil ang pamimitas ng bunga lilipat nalang sila sa malapit na eskwelahan at doon ito matatagpuan sa dulo ng kalsada namin at duon din matatagpuan ang masmalalaking puno at mas marami at sarisari mga bunga tulad ng makopa,kasoy, bayabas, santol, sampalok, duhat at marami pa iba. Pero bago mo marating ito kailangan muna umakyat sa pader na maytaas na 6talampakan at gawa sa adobe na kulay lumot at merun kinakalawang na alambre na patusok na tila nag bibigay ng babala na Bawal pumasok.
Sa pag lipas ng panahon napaka laki narin ng pinagbago ng lugar namin. Merun mga residente tumanda na at nagkapamilya. At ang mga kalaro ko na nangungupahan lang ay lumipat na ng tirahan. Ang Minsan putikan at mabato na kalsada namin ay ngayon sementado na. Binago na din ng panahon ang ugali ng mga tao. Wala ng malaking puno sa tapat ng bahay namin na pwede silungan at akayatin. Wala ng tutubi Gagamba, mariposa at tipaklong na pwede paglaruan. Wala ng mga batang pawisan na naglalaro sa kalsada na tatangkilik sa paninda ni Aling Usta. Nilipasan na ng panahon ang saradong tindahan ni Aling Fausta ang karatulang Ice Candy for sale ay di mo na rin makikita. Wala na din ang magkaibigan na nagwawalis sa harapan ng tindahan tuwing umaga.Ngayon matatapos na naman ang tag init subalit ang ala ala ng ice candy ay nandyan lang at di mawawaglit.
